المغرب بالأرقام
المغرب بالأرقام

واش كاين خصاص فالحولي؟

النقاش كيقول: “كاين الغلاء، يعني كاين الخصاص”. ولكن ملي كنفرّقو بين القطيع كامل، والحولي الذكر المحلي اللي بغاوه بزاف ديال الأسر فنفس النهار، كتبدّل الصورة.

تحليل DataBelarebia مبني على المعطيات للي جمّعت: أرقام رسمية، تصريحات منشورة، حسابات معلنة، وفرضيات واضحة.

🟢 رقم رسمي / مصدر مؤكد 🟡 حساب داتا من الأرقام 🟠 فرضية خاصها تبقى باينة
الإحصاء الرسمي للقطيع32.8Mرأس · غشت 2025 1
الغنم داخل القطيع23.16Mمنهم 16.35M أنثى 1
ذكور الغنم كبداية6.81M23.16M − 16.35M 1
الحولي الذكر المحلي المحتمل للعيد~5.3Mبعد التنقية والاستهلاك حساب

1. الرقم الكبير ما كيعنيش كلشي صالح للعيد

كاين جوج أرقام كيتخلطو بزاف فالنقاش: تصريح كيقول أن القطيع ولى قريب من 40M رأس، والإحصاء الرسمي الأخير لوزارة الفلاحة فغشت 2025 عطى 32,832,573 رأس. هادو ماشي بالضرورة نفس التاريخ ولا نفس طريقة الحساب. داكشي علاش هاد التحليل كنخدمو بحذر: الرسمي هو القاعدة، والتصريحات كنستعملوها غير باش نفهمو واش كاينت ولادات جديدة ممكن تزيد العرض.

تدقيق سريع ديال الأرقام

  • 32.8M رقم رسمي ومفصل: غنم، معز، بقر، وإبل.
  • 40M تصريح منشور فالسياق ديال 2026؛ كنعتابروه مؤشر، ماشي قاعدة نهائية.
  • السؤال الحقيقي ماشي “شحال القطيع كامل؟” بل “شحال من حولي ذكر محلي واجد للعيد؟”.

تكوين القطيع الوطني · غشت 2025

غنم23.16M
معز7.47M
بقر2.09M
إبل0.11M

2. من 6.81M ذكر، شحال باقي فعلاً؟

المفتاح ديال التحليل هو نركزو غير على الفئة اللي عليها الضغط: الحولي الذكر المحلي. ماشي كل ذكر داخل الإحصاء غادي يمشي للعيد: كاين فحول خاصهم يبقاو للتوالد، كاين اللي مريض أو فيه عيب، وكاين استهلاك عادي ديال الجزارة قبل العيد.

من الرقم الرسمي

فلترة العرض ديال الذكور

كنبدّاو من 6.81M ذكر غنم داخل الإحصاء الرسمي، ومن بعد كنحيدو اللي ما داخلش مباشرة فالأضحية، ونزيدو غير الجذعان اللي نقدرو نبرّروهم.

ذكور الغنم6.81M
بعد فحول/عيوب/نفوق5.81M
+ جذعان كملو السن6.44M
بعد استهلاك الجزارة5.30M

السطر ديال + جذعان كملو السن هو بالضبط فين كنستعملو حساب ~630k اللي مفسّر فالكارتة الثانية.

إضافة محسوبة

فين دخلات 630 ألف؟

هاد الإضافة كتربط بين التصريح ديال 40M والإحصاء الرسمي 32.8M. ما كنزيدوش الفرق كامل، غير الجزء اللي ممكن يكون غنم ذكر ووصل للسن.

7.2Mفرق تقريبي بين تصريح 40M والإحصاء الرسمي 32.8M
70%فرضية محافظة: الجزء الأكبر من الزيادة غنم
50%نصف تقريبي ذكور ونصف إناث
25%غير جزء صغير ممكن يكون كمل السن المناسب
الإضافة اللي دخلات فالفلترة~630k

هاد 630 ألف ماشي رقم رسمي بوحدو. هو حساب تقريبي باش ندخلو احتمال الولادات الجديدة بين الإحصاء الرسمي وتصريح 40M: كنخدو الفرق 7.2M، كنفرضو أن 70% منو غنم، نصفهم ذكور، ومن هاد الذكور غير 25% ممكن يكونو كملو السن والصلاحية للعيد. 7.2M × 70% × 50% × 25% ≈ 630k

علاش غير 25%؟ حيت دراسة IAV كتقول بلي 75% من ولادات الأغنام كتتركز بين أكتوبر وفبراير؛ يعني جزء كبير من المواليد كيكون مازال صغير أو مازال ما دخلش بوضوح لفئة الحولي الجاهز للعيد. 5

3. العرض كافي فالأوراق، ولكن الضغط على نوع واحد

رسمياً، حسب Le360، التصريح الحكومي كيقول أن العرض الوطني الموجّه لعيد الأضحى من الغنم والمعز هو يفوق 8 مليون رأس، مقابل طلب كيدور بين 6 و7 مليون. يعني هاد الرقم ماشي حساب ديالي، وماشي غير حولي ذكر؛ هو العرض العام ديال الأغنام والمعز. ولكن ملي الأسر كتزاحم بزاف على الكبش الذكر، كنوليو قريبين بزاف من الحافة. 3

المقارنة داخل “الحولي الذكر”

العرض المحلي المحسوب

~5.3M حولي ذكر

الطلب إذا 90% بغاو الذكر

~5.76M حولي ذكر

الفرق: ~460 ألف نقص، يعني حوالي 8%. هاد النقص الصغير نسبياً كافي يخلق زحام وغلاء فالسوق.

المقارنة العامة الرسمية

العرض الرسمي العام

8M+ رأس غنم ومعز

الطلب الرسمي

6–7M رأس

هنا المفارقة: 8M+ رقم رسمي عام للغنم والمعز الموجّهين للعيد، أما ~5.3M فهو حسابنا الضيق للحولي الذكر المحلي المحتمل. داكشي علاش ما خاصش نخلطو بين العرض العام وبين النوع اللي عليه الضغط. 3

4. الفرضية اللي كتبدّل كلشي: شحال باغيين الكبش الذكر؟

عدد الأسر قريب من 9.2M. إذا افترضنا أن 70% كيضحّيو، كنخرجو بـ~6.4M أضحية. السؤال الحاسم: شحال منهم غادي يطلبو بالضبط حولي ذكر؟

إلى غير 80% اختارو الذكر~5.1M

الخصاص كيختفي تقريباً، لأن الطلب كيقرب من العرض.

إلى 90% اختارو الذكر~5.76M

كيبان نقص صغير: حوالي 460 ألف رأس.

إلى كلشي تقريباً بغا الذكر~6.4M

الضغط كيكبر بزاف، والثمن كيطلع بسرعة.

5. علاش الثمن كيبقى طالع؟

1

العرض والطلب قريبين بزاف ففئة الذكور.ملي السوق واقف على الحافة، أي تخزين أو تأخير للبيع كيحرك الثمن.

2

الشناقة كيدخلو فالفجوة.الحكومة خرجات تدابير فـ18 ماي 2026 ضد الشراء بهدف إعادة البيع، المضاربة، والتخزين لخلق ندرة مصطنعة. 8

3

مفارقة “العام الزين”.إلى كان العلف والمراعي أحسن، الكسّاب ما كيبقاش مزروب يبيع؛ كيقدر يصبر ويخلي الخرفان يكبرو للعام الجاي.

4

العادات كتضغط على نفس الاختيار.شرعاً كاينين بدائل: النعجة، المعزة، والاشتراك فالبقرة أو الإبل على سبعة. ثقافياً، بزاف ديال الناس بغاو نفس الكبش. 7

الخلاصة

ماشي أزمة ماشية فالمغرب. الأزمة هي ضغط ثقافي وسلوكي على نوع واحد: الحولي الذكر المحلي، فنفس الأسبوع، وبثمن معقول. إذا توسعات الاختيارات — نعجة، معزة، أو اشتراك فبقرة — كيتبدل ميزان السوق بسرعة.

المصادر

  1. Maroc.ma / وزارة الفلاحة — الإحصاء الرسمي للقطيع، غشت 2025.
  2. TelQuel — تصريح 33–40 مليون وتحقيق الوسطاء.
  3. Le360 — العرض الرسمي يفوق 8 مليون، والطلب 6–7 مليون.
  4. Afrik وLe Site Info — الاعتماد على الإنتاج المحلي وتصريحات المهنيين.
  5. IAV Hassan II / AgriMaroc — توقيت ولادات الأغنام، 75% بين أكتوبر وفبراير.
  6. HCP RGPH 2024 — عدد الأسر الوطني.
  7. Sahih Muslim 1318a — الإبل والبقرة على سبعة.
  8. LeBrief — تدابير 18 ماي 2026 ضد المضاربة وإعادة البيع.
  9. YOP.ma — معطيات موسمية عن الإنتاج المحلي والمناخ والأسعار المرجعية.